Mbështetje për përgatitjen e Rregullores për Menaxhimin e Integruar të Mbetjeve

Çdo njësi e qeverisjes vendore apo grup njësish të qeverisjes vendore kanë detyrimin ligjor të përcaktojnë rregulloren për kontrollin e menaxhimit të rrymave specifike të mbetjeve, që gjenerohen në territorin e tyre. Miratimi i rregullores përmbush detyrimin e përcaktuar në Ligjin Nr.10 463, datë 22.09.2011 “Për Menaxhimin e Integruar të Mbetjeve” dhe VKM Nr. 418/2020, “Për Miratimin e Dokumentit të Politikave Strategjike dhe të Planit Kombëtar për Menaxhimin e Integruar të Mbetjeve, 2020–2035”
Me mbështetjen e projektit, ka nisur puna intensive për të mbështetur bashkitë në procesin e hartimit të këtij dokumenti.
Qëllimi i rregullores është:

Të lehtësojë dhe mundësojë zbatimin efektiv të kërkesave të legjislacionit;
Të mundësojë kontroll të vazhdueshëm në zbatimin e tyre
Të detajojë të drejtat dhe detyrat e të gjithë palëve që marrin pjesë në procesin e menaxhimit të integruar të mbetjeve

Në takimet e zhvilluara me grupet e punës si dhe me Këshillat Bashkiak të bashkive të qarkut, ekipi i projektit ka prezantuar konceptin dhe pasqyrën e përmbajtjes së rregullores.
Në rregullore përcaktohet mënyra e menaxhimit të mbetjeve në territorin e bashkisë përkatëse, rregullat, teknikat e metodat e menaxhimit me qëllim ofrimin e shërbimeve cilësore për qytetarët, mbrojtjen e mjedisit dhe nxitjen e përdorimit racional të burimeve natyrore.